((دنيا من غير العراق ))
تصورموطنك لو غير العراق
بلاد وافترض صارتلك الصين
ومتغني بعد منصورة بغداد
لازم تنگلب منصورة بكين
واتخييل تعيش ابدون امجاد
وتتركهه المضايف والفناجين
ويتغير تراثك والحضارات
واسد بابل تبدلة بخلگ تنين
وعلم يصبح الك وبدون الله
عليك وتختلف كل القوانين
وبعد ماكو صلاة وتترك الصوم
وتترك دينك وتتبع شياطين
واتخيل بلاد ابدون بغداد
واتخيل بلاد بدون الحسين
يمهم يختلف حت طعم الرغيف
يمهم تختلف حت ريحة الطين
الكيف هناك عدهم هو سلطان
ماتعرف زلمهه من النساوين
الشرف ينباع يمهم برخص اثمان
الغيرة هناك عدهم بالفلاسين
الجار هناك يمهم كلش ارخيص
ابيّن وتشتري اشكال الجوارين
بسرعة اتذكرت جيراني العزاز
العشت وياه احلى ايام وسنين
چنه اطفال نلعب مثل خوان
چنه اورود وتلمنه البساتين
تفرقنه فقط بس ساعة النوم
وتغفه بنومنه عيون الدرابين
صح حيطان تفصل بين البيوت
لكن ماتفرقنه الحياطين
صعب اني ابدل جاري وانساه
وابدل الزين اني بجار موزين
احب جيراني اني وسابع الجار
قسم بالجيرة مابدله بملايين
وقسم مابدّل بزهدية الفاو
هولندا وفرنسا وياهه برلين
صح عدهم امان وعايشة بخير
الفقير هناك عايش چالسلاطين
واحنه الجفن عدنه مخاوي الدموع
وفوگ جروحنه امصديه السچاچين
لكن مانعيش ابدون الفرات
بدون الماي متعيش الگطاطين
وتصور حالتك من دون العراق
وشوف شلون تختل الموازين
مثل مسجد تصير بدون اذان
ولامرة انقرت بيك القرائين
فرض گلنه نروح هناك ونعيش
وبعدني افرض فرض واحمرت العين
حمدت لله السترنه وجابنه هنا
ماغربلنه ربنه وجينه بالصين
الدنيه شتسوة من دونج يبغداد
والله بدون عينچ احنه ميتين