آنه البصره المدينه الفاضله الفيحاء
آنه الكثر الدمع سولف مصايبها
آنه الحلوه الرقيقه الفاتنه السمراء
آنه المايوم كرهنها حبايبها
آنه العندي كصايب من نخل جيكور
وآمس بآخر حرب كصو كصايبها
آنه المحد لمسني وآنه بنت بيوت
لجل ضلي زلم لزمت شواربها
جم مستكشف ومستشرق ورحال
سولف ماكدر يحصي عجايبها
آنه كبل المدن لوبزغ خيط النور
يجي خيط الشمس بخدودها آيحبها
آنه المالحه الغزرت باالبذات
ياكل خيرها وبليل ينهبها
آنه حروف آبجديه من الالف للياء
وكل علم النحو ماكدر يعربها
آنه الوكلت جاري التمر والجمار
وعيالي كلو بس من نوايبها
آنه حنت الفاو بجف المعرسات
تطيهن فرح ودموعها بخدها
ركظت ابلا وعيه وساعديت الطاح
طحت محد ركضلي وكال آساعدها
آنعد بالتبرع بآول الاسماء
بس وكت العطايه محد آيعدها
آنه آم الصدر آم الفزع خيال
هد بغيرته ومارضه آيلبدها
سستانيه آني وكاظميه غيض
والسستاني آبوها وخالها وجدها
آنه مريم العذره البلكنيسه تنام
مد أيده المسيح وكام كعدها
آنه الماقصرت بالواحد وتسعين
أنطيت الولد من كبل مولدها
آمس علكو ولدي قطع عالحيطان
ومن حزني قطع مصبوغ أسودها
آنه آجمل قصيده بدفتر السياب
يقراها الجبل والهور رددها
كحل عيني غزل ورموشي موالات
وسيوف الكحل برموشي مبردها
آنه بلقيس دوله بحضره سليمان
آنه اول خبر بشفاف هدهد ها
آنه آغنى مدينه وآفقر البلدان
وظل سوط الفقر كل ساع يجلدها
آنه آربات المضايف والحجي الموزون
آنه آم الشعر لوردت تنشدها
ماهزيت آبني ولاغفه بكاروك
صاحتله المنصه وراح يصعدها
خشم سمره وقدر الفشكـ من آيثور
ماحب المواضع ولبد بسدها
المواضع بيه تلبد من يصير آزماط
خاف يكول واحد غيره ماعدها
مع الود