خذني يمــــــــــــــك
اخذني يمك بعد ما ضل كل عذر لا تعتذر
ليل عمري وعمرك مخلص وبعد ما ضل صبر
خل نلم احلامنه وناخذ صورهن قبل لا ياخذهن بدربه الفجر
وخلي نلم الباقيات سنيني وسنينك ونسويهن عمر
وهنه ما يكفن عمر !
ونبدي من جده وجديد بواهس سنين الصغر
ولو وازانه الكبر
خلي تنسى ايامنه بخطوة العاقل من عثر مرة ورجع يمشي حذر
خلي نعيش الحب ستر
خلي نضم ارواحنه واسرارنه وبيناتنه لا نشتهر
افتخر بيه وي روحك واني اضل بيك افتخر
حبني لا تضل تعتذر
خل نسوي العشره ورقة ونصنع من الدمعة والضحكة حبر
حتى كل لحظة التمر بالجاي نكتبها شعر
وخل نكَول الماضي غلطة وذنب يسجل ذنب من ينذكر
حبني لا تضل تعتذر
حبني واجبرني على حبك
الروح ما تعشكـَ لون ما تنجبر
السيف ما ينهاب لو ماكو الطبر
اعترف وراح اعترفلك .. واحنا شو نفس الأمر
اثنينه انبعنه بسعر جوه السعر
اثنينه انبكنا حدر بشمس الظهر
اثنينه السچين تانتنه نذر
اثنينه اتوهمنا بالحب ننتصر
اثنينه نعاني الغدر
واعترف راح اعترفلك كَلبي چان شكَد جسر
واني جتفت الجسر
واني وزيت الحمامة عل النسر
واسمعت سر الخطر
وصنم سويته بديه وادري ما ينفع يضر
وحاطة كَبالي وعجيبة الشوكـَ منه ينتظر
وانتي مثلي بهل الأمر
صنم سويته بديك شتنتظر
خل نهدم اصنامنا وكافي كفر
وبلكي نهده ونستقر
وبلكت وياي وانا وياك استمر
وبلكت الما مر كبل هسه يمر
وبلكت جناح العشك البعيد ياخذنا ويفر
ونترك الممنوع والما يصير
وخل نغط بالماي مو صرنه جمر
وبلكي نصحى من السكر
وبلكت الما مر كَبل هسه يمر
خذني يمك
كَبل لا يخلص صبرنه ويطفى دم وجهنه وتطلع صفر
خذني يمك
كَبل لا يلحكَـ ذهبهه اطباعنه وتطلع صفر
خذني يمك
كَبل لا رمضان يفطر ويفكر العالم مثل جيه صفر
حطني يمك
كَبل لا يم الصفر ينحط صفر .
(ألشاعـــر ألرائع جبار رشيد)