الموضوع: لاتساوم

لاتساوم ....
لاتصادرلي قضيتي
الخيل من تركض
يظل اثر الحوافر ...
وانه فارس خيل
مابطل ركظهه
وايدي ماهدت رسنهه
ودوم غاير....
انه خيط من الشمس
صبحي وراي
وانت ظلمه
وعشرتك وحشة مكابر
لاتساوم ....
انه بعده اهناك ابني
خضرت روحه حمام
وصارت ضلوعه سواتر
وبعده دمه التارس النهران يحجي
وحتى ذرات التراب هناك تبجي ...
وانت جنك شو نسيت
سبع ميه والف شاب
نباكو بوضح النهار
وكلهه مكسورة خواطر
لاتساوم .....
انه ماعندي قصر
مثلك فقير
وبالكراج مبسط
بجمبر جكاير.....
ومن سمعت الصوت
لبيت النداء
وضلو اطفالي وزوجتي
الماكو عدهم قوت باجر
انه عفت ابني وخواته
بلايا قوت
وانت وين
بارقى سوك
اتدور لمرتك اساور
لاتساوم
اسكت اكرمني بسكوتك
انه صاحب مشكله
وازمة ضماير.....
وشتكل للباع ارضه
وعرضه.........
وعركة كصته برخص الدفاتر
وشتكل للصبح
باربيل يحدي
يبيع مناك برخص
فوك المنابر
خلهه سكته
ياشريكي....
وخلهن يولن هذني
انه اخوك بهل الوطن
بس غيري عابر
انه اخوك بهل وطن
بس غيري عابر

بقلم الشاعر جاسب الحمداني

قصيدة رائعة
صح لسانك أخي العزيز ~

لا فض فوك أخي جاسب الحمداني
كلمات رائعة
ومعبرة تحكي واقع مرير سببه أولئك الذين باعوا الأرض والعرض
بورك فيك منتظرين جديدك بشوق
لك إحترامي

شكري ومحبتي لكم اصدقائي الاعزاء
لكم محبتي واحترامي ​
كلماتكم الجميلة اسعدتني كثيرا .....

شكري ومحبتي لك اختي الفاضله ​

الله على الابداع